TƏBİB-in dəstəyi, Akademik M.Ə.Mirqasımov adına Respublika Klinik Xəstəxanasının və “Servier” şirkətinin birgə təşkilatçılığı ilə Dünya Ürək Gününə həsr edilən “Avropa Kardiologiya Cəmiyyətinin Konqresi 2023: Arterial hipertenziyanın idarə olunmasında yeni üfüqlər” adlı tədbir keçirilib.

Aztibb.az bu məlumatı Respublika Klinik Xəstəxanasının feysbuk səhifəsinə istinadla bildirir.

Tədbirdə Respublika Klinik Xəstəxanasının həkim kollektivi, Bakı Baş Səhiyyə Mərkəzi tabeliyində olan tibb müəsssisələrinin həkim-terapevt və kardioloqları iştirak ediblər.

Tədbirin açılışında Respublika Klinik Xəstəxanasının direktor müavini Mahir Babayev açılış nitqi ilə çıxış edib.

Bildirilib ki, bu kimi tədbirlərin keçirilməsi Respublika Klinik Xəstəxanasının və digər müəssisələrdə çalışan həkimlərin müxtəlif xəstəliklərin müasir diaqnostikası və müalicə üsulları istiqamətində fikir mübadiləsinin aparılması baxımından olduqca zəruridir.

Daha sonra Kardiologiya şöbəsinin müdiri Fərqanə Mahmudova ürək-damar xəstəliklərinin günündə təşkil olunan tədbirin əhəmiyyətini vurğulayıb.

Respublika Klinik Xəstəxanasının həkim-kardioloqu Mehriban İsgəndər arterial hipertenziyanın idarə olunması ilə bağlı ən son məlumatları auditoriyanın diqqətinə çatdırıb.

Tədbirin sonunda maraq doğuran müxtəlif suallara aydınlıq gətirilib.