Səhiyyə Nazirliyi V.Y.Axundov adına Elmi-Tədqiqat Tibbi Profilaktika İnstitutunda Mülki Müdafiə qərargahının iş planı çərçivəsində Təməl Həyat Dəstəyi (BLS – Basic Life Support) təlimi keçirilib.

 

İnstitutdan Aztibb.az-a bildirilib ki, təlimin keçirilməsində məqsəd tibb işçilərinin və Mülki Müdafiə dəstə üzvlərinin huşu və tənəffüsü olmayan xəstə, həmçinin yaralıya beynəlxalq standartlara uyğun Təməl Həyat Dəstəyi alqoritmini icra etmək bacarıqları üçün təməl prinsipləri və praktik vərdişləri mənimsəməkdir.

 

Təlim THD üzrə ÜST “Təlimçinin təlimi” proqramını keçmiş beynəlxalq sertifikatlı təlimçilər – şöbə müdiri, dosent Lalə Rüstəmova və həkim-infeksionist Həlimə Səfərli tərəfindən aparılıb.

 

İlkin mərhələdə klinika və laboratoriya şöbələrinin 10 nəfər əməkdaşı təlimə qatılıb. İştirakçılar praktik hissədə böyüklər, uşaqlar və körpələrdə keyfiyyətli KPR (kardiopulmonar resusitasiya) etmiş, eləcə də hava yolunun tam tıxanması zamanı tələb olunan addımların mulyajlar üzərində icra etmişlər. İştirakçıların təlim proqaramını mənimsə səviyyəsi təlimin əvvəlində pretest, təlimin sonunda isə posttest aparmaqla qiymətləndirilib. Keçirilən 1-ci təlimin nəticələrinə görə iştirakçıların proqramı mənimsəmə faizi 60-96% təşkil edib.

 

Növbəti təlimlərdə mərhələli şəkildə institutun digər əməkdaşlarının da iştirak etməsi nəzərdə tutulub.