Azərbaycan Pediatriya Cəmiyyəti və “SMA xəstələrinə yardım” İctimai Birliyinin birgə təşəbbüsü ilə “SMA hər yönü ilə” adlı iki hissədən ibarət tədbir keçirilib.
Bu barədə Aztibb.az-a Səhiyyə Nazirliyindən xəbər verilib.
Tədbirin məqsədi ölkəmizdə SMA (Spinal Muskulyar Atrofiya) xəstələrinin mövcud vəziyyəti ilə tanışlıq, yaşadıqları çətinliklər və gələcəkdə atıla biləcək addımların dövlət rəsmiləri ilə birgə dəyirmi masa ətrafında müzakirəsi olub.
Tədbirdə Səhiyyə Nazirliyi, həmçinin digər aidiyyəti dövlət qurumlarının rəhbər heyəti, Ümumdünya Səhiyyə Təşkilatının və bir sıra digər təsisatların nümayəndələri iştirak ediblər.
İlk olaraq Vətən müharibəsi şəhidlərinin əziz xatirəsi bir dəqiqəlik sükutla yad edilib.
Sonra Azərbaycan Pediatriya Cəmiyyətinin sədri Erkin Rəhimov çıxış edərək SMA xəstəliyinin yaranması və müalicə üsulları barədə çıxış edib.
“SMA xəstələrinə yardım” İctimai Birliyinin sədri Səməd Həsənli isə ölkəmizdəki mövcud vəziyyət və SMA xəstələrinin yaşadığı çətinliklər haqqında tədbir iştirakçılarını məlumatlandırıb.
Tədbirdə, həmçinin xaricdən dəvət edilmiş mütəxəssis Nino Nana Tatasvili bu sahədə beynəlxalq təcrübəsini bölüşüb.
Çıxışlar bitdikdən sonra dövlət rəsmiləri ilə mövcüd vəziyyət və atıla biləcək addımlarla bağlı fikir mübadiləsi aparılıb.
Tədbirin ikinci hissəsi həkimlər üçün elmi-praktiki konfransla yekunlaşıb.
