TƏBİB-in tabeliyindəki Sumqayıt Tibb Mərkəzinin (STM) direktoru Səkinə Sadıxova Vətən uğrunda canlarını fəda etmiş şəhidlərdən bəhs edən "Missiya" adlı qısametrajlı bədii filmin təqdimat mərasimində iştirak edib.

STM-dən Aztibb.az-a bildirilib ki, mərasimdə Səkinə Sadıxova çıxış edərək rəşadətli Azərbaycan Ordusunun qazandığı Zəfərdən, bu Qələbənin tarixi əhəmiyyətindən, Vətən müharibəsində Azərbaycan oğullarının qəhrəmanlığından danışıb.

Direktor bildirib ki, Prezident, Ali Baş Komandan İlham Əliyevin rəhbərliyi ilə 44 günlük Vətən Müharibəsində qəhrəman ordumuzun rəşadəti ilə şəhidlərimizin canı-qanı bahasına Ermənistanın 30 il ərzində işğalı altında olan torpaqlarımız azad edilərək tarixi qələbəyə imza atıldı.

Qeyd edilib ki, bu gün qəhrəmanlarımızın ailə üzvləri ölkə Prezidenti İlham Əliyev, Birinci vitse-prezident Mehriban xanım Əliyeva tərəfindən daim diqqət mərkəzində saxlanılır.

Vurğulanıb ki, Sumqayıt Tibb Mərkəzi və tabeçiliyində olan müəssisələr tərəfindən şəhid ailələri və qazilərin müayinə, müalicələrinin təşkili, onlara sağlamlaşdırıcı tədbirlərin göstərilməsi istiqamətində zəruri addımlar atılır.

Direktor rəhbərlik etdiyi mərkəz tərəfindən şəhid ailələri və qazilərin daim diqqət mərkəzində saxlanıldığını, onların sosial təminatı istiqamətində tədbirlərin davam etdiyini diqqətə çatdırıb.

Qeyd edək ki, film Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maddi dəstəyi ilə "Şəhid Analarına Dəstək" İctimai Birliyinin "Zəfərin şahinləri şəhidlər qonaq gəlib" layihəsi çərçivəsində ərsəyə gəlib.

Filmin bəzi epizodları TƏBİB-in tabeliyindəki Sumqayıt Tibb Mərkəzinin 1 nömrəli Xəstəxanasında lentə alınıb.