1893-cü ildə özülü qoyulan M.Əfəndiyev adına Xətai Tibb Mərkəzi tibb mütəxəssislərinin, alimlərin təhsil və təcrübə mərkəzi olub. Uzun illər görkəmli alimlər - akademik M.Topçubaşov, professor M.Əfəndiyev, professor İ.Topçubaşov bu mərkəzdə çalışıb, ilklərə imza atıblar.

 

Aztibb.az Xətai Tibb Mərkəzinin feysbuk səhifəsinə istinadla xəbər verir ki, akademik M.Topçubaşovun rəhbərliyi altında xəstəxanada 35 tibb elmləri doktoru və tibb elmləri namizədi hazırlanıb. 50 il ərzində M. Topçubaşov yüzlərlə cərrah yetişdirib. Onun rəhbərliyi ilə ilk cərrahiyə otağı-lektoriya tikilib.

 

1938-ci ildə akademik ilk dəfə efir yağlı narkozdan Xətai Tibb Mərkəzində istifadə edib.

 

Həmçinin burada professor M.Əfəndiyevin rəhbərliyi ilə yüksəkixtisaslı terapevtlər hazırlanıb. 1935-ci ildə onun təşəbbüsü ilə Daxili xəstəliklər kafedrası yaradılıb. Bu kafedrada Azərbaycan Tibb İnstitutunun Pediatriya və Sanitariya fakültələrinin tələbələri daxili xəstəliklər üzrə dərs keçiblər.

 

Qoyulan ənənə hazırda da davam etdirilir. TƏBİB-nin tabeliyində olan Xətai Tibb Mərkəzi yalnız müalicə ocağı deyil, həm də tibbi təhsil və təcrübə mərkəzidir. Azərbaycan Tibb Universitetinin III Cərrahiyyə Xəstəliklər kafedrasının tələbələri Xətai Tibb Mərkəzində dərs keçirlər.