Azərbaycan Respublikası Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutunda (ETPİ) “Uşaqlar arasında düzgün təxliyənin təşkili” mövzusunda seminar keçirilib.

 

ETPİ-dən Aztibb.az-a bildirilib ki, seminarın açılışında institutun direktoru v.i.e., tibb üzrə fəlsəfə doktoru, dosent Aynur Poluxova, Azərbaycan Respublikası Səhiyyə Nazirliyinin Səhiyyə siyasəti şöbəsinin Ana və uşaq sağlamlığının qorunması sektorunun müdiri Aynurə Zeynalova, direktorun elmi işlər üzrə müavini, t.e.d., dos. Nailə Rəhimova çıxış ediblər.

 

Qeyd edilib ki, tədbirin məqsədi yenidoğulanların aparılmış düzgün təxliyəsi nəticəsində neonatal ölüm səviyyəsinin azaldılması, “Ana və uşaqların sağlamlığının qorunması” üzrə Dövlət Proqramı çərcivəsində uşaqlara göstərilən tibbi xidmətlərin keyfiyyət və səmərəliliyinin yüksəldilməsi, xəstələrin təxliyəsi zamanı beynəlxalq meyarlarının tətbiq edilməsidir. Həmçinin "Yenidoğulanların təxliyəsi" adlı metodik tövsiyə haqqında məlumat verilib. Bildirilib ki, metodik tövsiyədə təxliyənın növləri, yenidoğulanların təxliyəsinə göstəriş və əks göstərişlər, təxliyənin təşkili və bu zaman yenidoğulanların vəziyyətlərinin qiymətləndirilməsi ətraflı təsvir olunub. Təqdim olunan metodik tövsiyə reanimatoloq, neonatoloq, pediatr, həkim rezidentlər üçün nəzərdə tutulub və Azərbaycan Respublikası Səhiyyə Nazirliyinin Elmi Tibbi Şurasının 23 may 2022-ci il tarixli Qərarı ilə təsdiq edilib. Diqqətə çatdırılıb ki, ETPİ-də yenidoğulanların təxliyəsi bu metodik tövsiyə əsasında həyata keçirilir.

 

Əyani və distant formada keçirilən seminarda “Yenidoğulanlarda təxliyənin prinsipləri”, “Elmi-Tədqiqat Pediatriya İnstitutuna daxil olan xəstələrin strukturu, profili və təxliyəsində yaranan problemlər”, "ETPİ-də statistik sənədlərin tərtibi qaydaları" mövzularında çıxışlar olub.

 

Uşaq və körpələr arasında ölüm hallarının azaldılması məqsədilə keçirilən tədbirdə distant olaraq respublikanın müxtəlif regionlarının iştirakı da təmin olunub. 

 

Sonda mövzular ətrafında geniş müzakirələr aparılıb, iştirakçıların sualları cavablandırılıb.