Ürək-damar cərrahiyyəsi mütəxəssisi, prof. Serkan Durdunun rəhbərlik etdiyi qrup tərəfindən dünyada nadir hallarda icra edilən qapalı üsulla canlı olaraq 3 ayrı xəstə üzərində ürək əməliyyatı aparılıb.

Aztibb.az-ın medimagazin.com.tr-yə istinadla xəbərinə görə, əməliyyatları izləyən həkimlər canlı yayımda suallar verərək əməliyyat texnikası haqqında məlumat alıblar.

Prof. S.Durdu yeni texnologiya ilə ürək sağlamlığının qorunması sahəsində mühüm addımların atıldığını bildirib. O, müalicədəki inqilabi yeniliklərin xəstələrin rahatlığını artırdığını açıqlayıb.

S.Durdu kiçik bir kəsiklə qapalı üsulla həyata keçirilən "mini invaziv" adlı texnikanın dünyada bir neçə mərkəzdə tətbiq edildiyini diqqətə çatdırıb.

Türk cərrahların bu sahədə uğurlu fəaliyyətləri ilə dünyaya nümunə olduqlarını vurğulayan Durdu, canlı olaraq həyata keçirilən ürək əməliyyatları ilə ölkə daxilində və xaricdə ürək-damar cərrahlarına təlim keçdiklərini bildirib: "Təlimə Almaniya, İngiltərə, İraq, İran, Belçika ilə yanaşı, Qırğızıstan və Özbəkistandan da cərrahlar qatılıblar. 200 cərrahdan 25-i xarici, 175-i yerli həkim idi".