15 sentyabr 2023-cü il tarixində Mərkəzi Gömrük Hospitalında Azərbaycan Respublikası Dövlət Gömrük Komitəsinin Tibbi Xidmət İdarəsinin “Abbott” şirkəti ilə imzaladığı memorandum çərçivəsində növbəti görüş keçirilib.

Bu barədə Aztibb.az-a Mərkəzi Gömrük Hospitalından məlumat verilib.

Bildirilib ki, görüşdə Azərbaycan Respublikası Dövlət Gömrük Komitəsinin Tibbi Xidmət İdarəsinin rəis müavini İsmayıl Əfəndiyev, Elmi Təcrübi Tədris Mərkəzinin mütəxəssisi Şəhla Mirzəzadə, Mərkəzi Gömrük Hospitalının rəis müavini Nabil Seyidov, Kardiologiya şöbəsinin rəisi, invaziv kardioloq İlqar Tahiroğlu, Tibbi Xidmət İdarəsinin PR üzrə mütəxəssis Dilarə Zamanova və “Abbott” şirkətinin Rusiya və MDB üzrə Ürək Cərrahiyyəsi şöbəsinin müdiri Aleksey Potebnya, Müstəqil Dövlətlər Birliyi üzrə nümayəndə Baqdad Nuşanbekkızı iştirak ediblər.

Görüşdə imzalanmış memorandum cərçivəsində əməkdaşlığın növbəti addımları istiqamətində TAVİ prosedurlarının Azərbaycanda inkişafı, mitral klip əməliyyatının ölkəmizdə tətbiq olunmasının perspektivləri, ürək-damar cərrahiyyəsi sahəsində metodik vəsaitlərin və protokolların hazırlanması və praktikada tətbiqi, o cümlədən  Mərkəzi Gömrük  Hospitalının Avropanın qabaqcıl tibb müəssislərində təcrübə proqramlarında iştirakı məsələləri və hər iki tərəfin marağında olan digər məsələlər müzakirə olunub.