Orxan İsayev ATU-nun Elmi-Tədqiqat Mərkəzinə direktor təyin olunub
14.09.2023 19:38

Azərbaycan Tibb Universitetinin (ATU) Elmi-Tədqiqat Mərkəzində yeni direktor təyinatı olub.

 

Aztibb.az-ın xəbərinə görə, sözügedən vəzifəyə unuversitetin Beynəlxalq əlaqələr üzrə prorektoru, Histologiya, sitologiya və embriologiya kafedrasının dosenti Orxan İsayev təyin olunub.

 

Qeyd edək ki, Orxan İsayev 2011-ci ildə ATU-nun I müalicə-profilaktika fakültəsini fərqlənmə diplomu ilə bitirib. 2012-ci ildə Almaniya Federativ Respublikasının Heidelberg Universitetinin doktoranturasına daxil olub, Molekulyar Onkocərrahiyə elmi-tədqiqat qrupunda kök hüceyrələr sahəsi üzrə araşdırmalar aparıb və 2014-cü ildə dissertasiya işini uğurla müdafiə edib. Azərbaycan Respublikasının Prezidenti yanında Ali Attestasiya Komissiyasının 13 yanvar 2016-ci il tarixli qərarı ilə tibb üzrə fəlsəfə doktoru elmi dərəcəsini alıb.

 

Orxan İsayev ölkəmizdə kök hüceyrələri sahəsində tanınmış mütəxəssisdir. O, 2015-2016-cı illərdə ATU-nun Elmi Tədqiqat Mərkəzində kiçik elmi işçi kimi fəaliyyət göstərib. 

 

24 noyabr 2016-ci ildə müsabiqə yolu ilə ATU-nun Histologiya, embriologiya və sitologiya kafedrasına assistent vəzifəsinə seçilib və indiyədək həmin kafedranın dosentidir. 2017-ci ildə ATU-nun Xarici Tələbələrlə iş üzrə dekan müavini olub, daha sonra unuversitetin Beynəlxalq əlaqələr üzrə prorektoru təyin edilib. 

Nərgiz Qəhramanova
Müəllifin digər yazıları
ÇOX OXUNANLAR