Öd daşı xəstəliyinə zamanında müdaxilə olunmadıqda ciddi fəsadlara yol aça bilər. Yəni, öd kisəsi vaxtında çıxarılmasa bu, öd yollarının tutulması, sarılıq, mədəaltı vəzin iltihabı (pankreatit) və hətta ölümlə də nəticələnə bilər.

Aztibb.az xəbər verir ki, bu barədə Səhiyyə Nazirliyinin mütəxəssis-eksperti, Mərkəzi Gömrük Hospitalının Cərrahiyyə və orqan transplantasiyası şöbəsinin rəisi, cərrah transplantoloq, t.ü.f.d. Mircəlal Kazımi feysbuk səhifəsində paylaşım edib.

Mircəlal Kazımi qeyd edib ki, pasiyent uzun müddət öd daşı xəstəliyindən əziyyət çəkirdi, daşlardan bir neçəsi ana öd kanalına düşmüşdü. O, xəstəyə eyni seansda öd yollarından daşların təmizlənməsi (ERXP - endoskopik retroqrad xolangiopankreatoqrafiya ilə) və öd kisəsinin xaric edilməsi (xolesistektomiya) əməliyyatlarını icra etdiklərini bildirib.

Həkim bu işdə əməyi olan hər bir kəsə, xüsusilə Namiq Novruzov və Aynur Sofiyevaya təşəkkür edib.