İsveçin Stokholm şəhərində “Yoluxucu xəstəliklərə qarşı cavab tədbirləri üçün sosial və davranış elmlərinin istifadəsi” mövzusunda ikigünlük seminar keçirilib.

 

Avropa Xəstəliklərin Profilaktikası və Nəzarəti Mərkəzinin (ECDC) Sağlamlıq Təhlükəsizliyi üzrə Avropa İttifaqı Təşəbbüsü çərçivəsində təşkil edilən seminarda Səhiyyə Nazirliyi İctimai Səhiyyə və İslahatlar Mərkəzinin (İSİM) nümayəndələri də iştirak ediblər.

 

Səhiyyə Nazirliyindən Aztibb.az-a verilən məlumata görə, seminarın əsas məqsədi sosial və davranış elmlərinin ictimai səhiyyə hazırlığı və cavab tədbirləri üçün vacibliyinin öyrənilməsi, fövqəladə hallara dair sosial və davranış tədqiqatlarının aparılması üçün bəzi əsas metodların, praktiki və nəzəri araşdırmaların diqqətə çatdırılması olub.

 

Tədbirdə “Sosial və davranış elmlərinin yoluxucu xəstəliklərin təhlükələrinin qarşısının alınmasında və nəzarətində rolu”, “Epidemiyaya nəzarətin dəstəklənməsi üçün keyfiyyət və kəmiyyət metodologiyaları”, “COVID-19 pandemiyası zamanı sosial və davranış elmlərinə perspektivlərin dəyişdirilməsi”, “Sosial dinləmə və dezinformasiyanın aradan qaldırılması”, “Sosial elmlərin tədqiqat nəticələrininin ictimaiyyətə çatdırılması” və s. mövzularda təqdimatlar dinlənilib, plenar müzakirələr aparılıb.