Mərkəzi Gömrük Hospitalının Mama-ginekologiya şöbəsinin mama-ginekoloqu, t.ü.f.d. Mehriban Əmirova İtaliyanın Avellino şəhərində dünya şohrətli alim, prof. Mario Malzoninin rəhbərliyi altında keçirilən “Ginekologiyada lazer tətbiqi” mövzusunda beynəlxalq master-klassda iştirak edib.

 

Aztibb.az-a Hospitaldan verilən məlumata görə, İtaliyanın məşhur mərkəzlərindən biri sayılan Prof. Mario Malzoni Center klinikasının professoru Malzoni və aparıcı mütəxəssisləri tərəfindən iştirakçılar üçün master-klassda məruzələr oxunub, canlı əməliyyatlar nümayiş etdirilib.

 

Həmçinin cərrahi ginekologiyada müasir üsullardan biri olan lazerin qadın xəstəliklərinin (endometriozis, mioma, endometrial poliplərin) müalicəsində tətbiqi barədə təcrübələr bölüşülüb, bu sahənin yenilikləri haqqında geniş müzakirələr aparılıb.

 

Master-klassda Azərbaycanla yanaşı, Slovakiya, İsrail, Birləşmiş Ərəb Əmirliyi, Afrika və digər ölkələrdən nümayəndələr iştirak ediblər. 

 

Tədbirin sonunda iştirakçılara sertifikatlar təqdim edilib.