Havaların kəskin dəyişməsi ilə əlaqədar əhali arasında qrip və kəskin respirator virus infeksiyalarında artım müşahidə olunur. Kəskin respirator virus infeksiyasının yalnız virus etiologiyalı olması mübahisəli məsələdir, bakterial törədicilər ilə də yoluxma mümkündür.

 

Aztibb.az xəbər verir ki, Mingəçevir Şəhər Mərkəzi Xəstəxanasının Ailə Sağlamlıq Mərkəzinin həkim-terapevti Fəridə Rəşidzadə bildirib ki, qrip (influenza) əhali arasında adi xəstəlik kimi qəbul edilsə də, potensial olaraq kifayət qədər təhlükəli xəstəlikdir. Hər il qripə milyonlarla insan yoluxur. Hava-damcı yolu ilə ötürülən yüksək kontagioz xəstəlikdir.

 

Terapevt qeyd edib ki, qripin ağırlaşmaları çox təhlükəldir. Bunlara otit, haymorit (qulaq və burun sinuzları), meningit (beyin qişasının iltihabı), traxeit (traxeyaların iltihab), miokardit (ürək əzələsinin ilthabı), pnevmoniya, bronxut (ağciyər və bronxların iltihabı), qlomerulonefrit (böyrəklərin yumaqcıq aparatının iltihabi zədələnməsi) aiddir:

 

"Hər bir xəstəlikdən, eləcə də kəskin respirator virus infeksiyaları və qripdən qorunmağın ən yaxşı vasitəsi vaxtında aparılan profilaktik tədbirlər və peyvəndlərin vurulmasıdır. Bu səbəbdən çalışın xəstələməyəsiniz. Müasir tibb istənilən xəstəlik yaranmazdan əvvəl onunla mübarizə aparmağa imkan verir. Ona görə də xəstələnməzdən əvvəl sağlamlığınızın qeydinə qalın".