Sentyabrın 5-dən etibarən Azərbaycan Tibb Universitetinə (ATU) bu il daxil olan tələbələrin sənədlərinin qəbuluna start verilib. 

Universitetin bütün fakültə dekanları, dekan müavinləri, akademik məsləhətçi, fakültənin tələbə dekanı, Tələbə Həmkarlar və Tələbə Gənclər təşkilatlarının sədrlərinin birgə iştirakı ilə sənədlərin qəbulu prosesi izlənilib. Prosesə universitetin Tədris Departamentinin rəhbəri, dosent Kamandar Yaqubov nəzarət edib.

ATU-dan Aztibb.az-a bildirilib ki, tələbə olmaq hüququ qazananlar ilk öncə Elm və Təhsil Nazirliyinin portalında qeydiyyatdan keçirlər. Daha sonra sənədlərini qeydiyyatdan keçirmək üçün universitetə təqdim edirlər.

Dosent K.Yaqubov sentyabrın 14-də hər fakültə üzrə dekan və dekan müavinlərinin iştirakı ilə mühazirə zallarında tələbə və valideynləri ilə görüş keçiriləcəyini bildirib. Qeyd edib ki, bu görüşdə universitetdə tədrisin təşkili, tədris bazaları, kitabxana, eyni zamanda tələbə üçün maraqlı olan bütün məqamlar diqqətə çatdırılacaq, onların suallarına aydınlıq gətiriləcək. Bu ildən başlayaraq tələbələrə buklet təqdim olunacaq. Bukletdə universitet, dekanlıq, dekanlığın heyəti, balların hesablanması və tələbə üçün vacib olan digər məqamlar öz əksini tapıb.

Onun sözlərinə görə, 2023-2024-cü tədris ilində tibb ixtisasında plan yeri 550-dən 600-ə, stomatologiyada 70-dən 100-ə, ictimai səhiyyədə 70-dən 80-ə, tibb bacısı işində 40-dan 60-a, əczaçılıqda 70-dən 80-ə artırılıb.  Sevindirici haldır ki, plan yerlərimiz dolub:

"98 saylı Kəlbəcər məktəbini bitirən Turani Məhərrəmli 684.2 bal toplayıb. Gələcəyin cərrahı olmaq istəyir. Zaqatala şəhər Ş.Qurbanov adına 3 saylı orta məktəbi bitirən Nəzrin Məmmədova 659.9 bal toplayıb. Tibb ixtisası üzrə təhsil alacaq. Kimya-biologiya təmayüllü respublika liseyini bitirən Xumar Feyziyeva isə 564 balla Stomatologiya fakültəsinə daxil olub. Arzusu gələcəyin stomatoloqu olmaqdı".