Akademik Zərifə Əliyeva adına Milli Oftalmologiya Mərkəzi və Azərbaycan Oftalmoloqlar Cəmiyyətinin birgə təşəbbüsü ilə Mərkəzin Şəki filialında “Regionlarda oftalmologiyanın aktual məsələləri” mövzusunda elmi seminar keçirilib.

Bu barədə Aztibb.az-a Milli Oftalmologiya Mərkəzindən xəbər verilib.

Bildirilib ki, Mərkəzin direktoru, professor Elmar Qasımovun rəhbərliyi ilə baş tutan seminar region həkimləri tərəfindən gənc oftalmoloqların inkişafına dəstək ola biləcək qarşılıqlı fikir və təcrübə mübadiləsinin aparılması məqsədini daşıyıb.

Çıxışlar zamanı oftalmoloqlar öz bilik və praktik bacarıqlarını bölüşüb, təkliflərini səsləndiriblər.

Seminarda Faiq Quliyevin “Akademik Z.Əliyeva adına MOM-um Şəki filialının regionda rolu, gecikdirilmiş kataraktalar və baş verə biləcək fəsadlar”, Sona İbrahimovanın “Qapalı bucaqlı qlaukoma haqqında nə bilməliyik? Əsas məqamlar”, Elsevər Həmidovun “Şəki filialında vitreoretinal xəstəliklərin müalicəsi”, t.ü.f.d. Ruhəngiz Balayevanın “Göz qapaqlarının bədxassəli törəmələri”, t.ü.f.d. Mirana Mirişovanın “Kataraktanın ekstraksiyası əməliyyatından sonrakı qalıq refraksiyanın Eksimer lazerlə korreksiyası”, Humay Bayramovanın “Göz travmalarına düzgün yanaşma taktikası”, Rövşən Rəcəblinin “Buynuz qişa xəstəlikləri və keratoplastika” və Lalə Məmmədovanın “Şəki şəhərində çəpgözlük diaqnozu ilə aparılan müayinə və müalicələrin nəticəsi” adlı məruzələri dinlənilib.

Tədbirdə akademik Zərifə Əliyeva adına Milli Oftalmologiya Mərkəzinin direktor müavini Ceyhun Nəzərli, Elmi-məlumat, tədris və təşkilati-metodik bölməsinin müdiri, t.ü.f.d. Yazgül Abdiyeva və region həkimləri iştirak ediblər.