İnsanın İmmunçatışmazlığı Virusu (İİV) ilə mübarizədə həkimlərin arsenalına yeni müasir və təsirli üsul əlavə olunmaqdadır. Hazırda uğurla aparılan tədqiqatların yaxın gələcəkdə bu infeksiyanı tam cilovlamağa imkan verəcəyinə ümid edilir.

Aztibb.az-a Respublika QİÇS-lə Mübarizə Mərkəzindən verilən xəbərə görə, Mərkəzdə İİV infeksiyasına yoluxmuş şəxslərin müalicəsində kök hüceyrələrinin tətbiqi ilə bağlı seminar keçirilib.

Seminarda Səhiyyə Nazirliyinin Tibbi Profilaktika Elmi-Tədqiqat İnstitutunun Kök hüceyrələrinin müxtəlif patologiyalarda istifadəsi üzrə tədqiqat laboratoriyasının qrup rəhbəri, tibb üzrə fəlsəfə doktoru Rəşad Rəsulovun mövzu üzrə təqdimatı dinlənilib.

R.Rəsulov yaxın keçmişdə COVID-19 virusuna yoluxanların qeyd edilən metodika ilə müalicəsində yüksək nəticələr barədə məlumat verib. O, analoji olaraq bu üsulun İİV-lə mübarizədə təkmilləşdirilməsi üzərində bir çox ölkələrin işlədiyini bildirib.

Təqdimat mərasimində İİV infeksiyasına yoluxmuş şəxslərin müalicəsində kök hüceyrələrinin tətbiqi ilə bağlı geniş müzakirələr aparılıb, Respublika QİÇS-lə Mübarizə Mərkəzi ilə birlikdə elmi-tədqiqat işlərinin həyata keçirilməsi planlaşdırılıb.