6-8 sentyabr tarixlərində Ümumdünya Səhiyyə Təşkilatının (ÜST) mütəxəssisləri ilə laboratoriya üzrə milli siyasət və strateji planın hazırlanması üzrə işçi qrupun 3-cü görüşü keçirilib.
Aztibb.az ÜST-nin Azərbaycan Nümayəndəliyinin rəsmi feysbuk səhifəsinə istinadla xəbər verir ki, tədbirin əsas məqsədi Azərbaycanda laboratoriya fəaliyyəti ilə bağlı milli siyasət və strateji sənədlərin formalaşdırılmasında Milli Laboratoriya İşçi Qrupuna əlavə məsləhətlər vermək idi.
Görüş zamanı müxtəlif qurumlar, o cümlədən Azərbaycan Respublikası Səhiyyə Nazirliyi, TƏBİB, Dövlət Gömrük Komitəsi, Azərbaycan Respublikası Ədliyyə Nazirliyi, Azərbaycan Qida Təhlükəsizliyi Agentliyinin texniki ekspertləri tərəfindən laboratoriya sisteminin situasiya təhlilinin yenilənmiş nəticələri təqdim edilib.
Məqsəd sektorlar arası ekspert qrupunu mövcud kontekstdə, habelə boşluqların təhlili və milli strateji planın əsas istiqamətlərinin formalaşdırılması ilə bağlı hərtərəfli müzakirələrə cəlb etmək idi.
Bu müzakirələrin nəticələri ölkədə laboratoriya sisteminin gücləndirilməsinə və təkmilləşdirilməsinə yönəlmiş çoxsahəli milli laboratoriya siyasətinin və strateji planının hazırlanmasına dəstək olmaq məqsədi daşıyır.
