“Həkimlərimizi tanıyaq!” rubrikamızda Sizlərə pasiyentlərin hər birinə fərdi yanaşan, onları diqqətlə dinləməyi bacaran yüksəkixtisaslı həkim-psixiatr, tibb üzrə fəlsəfə doktoru Gülay Məmmədzadəni  təqdim edirik.

O, 2006-cı ildə Azərbaycan Tibb Universitetinin Müalicə işi fakültəsini bitirib, 2006-2007-ci illərdə 1 saylı Kliniki Psixiatriya Xəstəxanasında həkim-psixiatr ixtisası üzrə internatura keçib. 2015-2016 Harvard School of Public Health Universitetində və Boston Children’s Hospitalında 2 illik psixi sağlamlıq və elmi işlərin aparılması üzrə ixtisasartırma kursunda olub, 2020-2022-ci illərdə Böyük Britaniyanın London şəhərində İmperial London kollecində ictimai səhiyyə üzrə magistraturanı bitirib. 2019-cu ildə dissertasiya işini uğurla müdafiə edərək tibb üzrə fəlsəfə doktoru elmi dərəcəsini alıb.

Gülay Məmmədzadə 2007-ci ildə Bərpa Tibb Mərkəzində əmək fəaliyyətinə başlayıb və 2009-cu ilə qədər orada həkim-psixiatr işləyib. 2009-2019-ci illərdə Azərbaycan Tibb Universitetinin Psixiatriya kafedrasında əvvəlcə baş laborant, sonra assistent kimi fəaliyyət göstərib. 2019-2021-ci illərdə  Azərbaycan Tibb Universiteti  Rezidentura və magistratura şöbəsinin müdir müavini vəzifəsində çalışıb. 2023-cü ildən Mərkəzi Gömrük Hospitalında  həkim-psixiatr kimi fəaliyyətini davam etdirir.

Həkim Gömrük Hospitalında müxtəlif mənşəli depressiyalar, təşviş-həyəcan pozuntuları, panik tutmalar, ağır stress nəticəsində psixi pozuntular, qida qəbulunun pozuntuları (anoreksiya, bulimiya), üzvi (orqanik) zədələnmələr nəticəsində psixi pozuntular, bipolar affektiv pozuntu, şizofreniya və digər psixotik pozuntuların müayinə və müalicəsini həyata keçirir. 

O, daim öz üzərində çalışan, dünya mətbuatını izləyən, inkişaf etmiş ölkələrdə səhiyyə sisteminin son nailiyyətləri ilə tanış olan və bu təcrübədən bəhrələnən yüksəkixtisaslı həkimdir. Gülay Məmmədzadə Psixiatriya Assosiasiyasının müxtəlif illərdə keçirilən 22, 24, 26, 28, 30 və 31-ci konqreslərində iştirak edib, 2011-ci ildə Bakıda Azərbaycan Müəllimlər İnstitutunda keçirilmiş “Təhsilin əsasları” fənni bazasında hazırlanmış müasir pedaqogika və psixologiya ilə bağlı kursda iştirak edib, 2016-cı ildə  Harvard Universiteti və Koç Universitetinin təşkilatçılığı ilə Tədqiqat aparma üsulları və səhiyyə elmlərində etik yanaşma üzrə yay kursu keçib, həmçinin 2020-ci ildə  Harvard Medical School-da  təşkil olunmuş kursun iştiakçısı olub. 

T.ü.f.d. Gülay Məmmədzadə Azərbaycan Psixiatriya Assosiasiyasının, Avropa Psixiatriya Assosiasiyasının və Beynəlxalq Psixo Onkologiya Cəmiyyətinin üzvüdür.