Tibbi Ərazi Bölmələrini İdarəetmə Birliyinin (TƏBİB) nümayəndə heyəti “Türk Yoğun Bakım Uzmanları Derneği” tərəfindən (TÜYUD) İstanbulda keçirilən XVI Ümumdünya Reanimasiya Konqresinə (WICC 2023) qatılıb.

 

 

Aztibb.az-a TƏBİB-dən bildirilib ki, konqres 85-dən çox beynəlxalq dərnək və reanimasiya birliyini bir araya toplayan Dünya Reanimasiya Federasiyasının rəsmi tədbiridir. Konqres “World Federation of Intensive and Critical Care” (WFICC) tərəfindən hər 2 ildə bir dəfə təşkil edilir. Bundan öncə konqres Avstraliyada baş tutub, İstanbuldan sonra isə Kanadada keçiriləcək.

 

Konqresin missiyası intensiv müalicə, reanimasiya sahəsində çalışan həkim mütəxəssislərin bilik, təcrübə və tədqiqat nəticələrini bölüşmək, təcrübə mübadiləsi, intensiv və kritik qayğı ilə bağlı təhsil və tədqiqat şəbəkələri yaratmaq, xəstələrə qulluq standartlarını, eləcə də keyfiyyətini yaxşılaşdırmaqdır.

 

“Türk Yoğun Bakım Uzmanları Derneği”nin dəvəti ilə TƏBİB-in Davamlı tibbi təhsil şöbəsinin böyük məsləhətçisi Nahidə Mahmudova və tabeli tibb müəssisələrinin müvafiq ixtisas həkimlərindən ibarət 10 nəfərlik heyət konqresdə iştirak edib.

 

Səfər çərçivəsində dərnəyin İdarə heyəti və konqresin təşkilat komitəsi ilə TƏBİB-in nümayəndə heyəti arasında keçirilən işgüzar görüşdə əməkdaşlığın genişləndirilməsi və prioritetlər nəzərə alınmaqla sonrakı fəaliyyət istiqamətləri barədə geniş müzakirələr aparılıb.