Ağır xəstələrə xüsusi qayğı və diqqətlə yanaşan yüksəkixtisaslı anestezioloq-reanimatoloq - Xəyal Məmmədov - aztibb.az AZƏRBAYCANIN SƏHİYYƏ XƏBƏR PORTALI

Ağır xəstələrə xüsusi qayğı və diqqətlə yanaşan yüksəkixtisaslı anestezioloq-reanimatoloq - Xəyal Məmmədov

04.09.2023 16:48

“Həkimlərimizi tanıyaq!” rubrikamızda Sizə Mərkəzi Gömrük Hospitalının Reanimasiya və anesteziologiya şöbəsinin anestezioloq-reanimatoloqu, ağır xəstələrə xüsusi qayğı və diqqətlə yanaşan yüksəkixtisaslı anestezioloq-reanimatoloq Xəyal Məmmədovu təqdim edirik.

O, 1996-cı ildə Azərbaycan Tibb Universitetinin Müalicə-profilaktika fakültəsini bitirdikdən sonra 1996-1997-ci illərdə ATU-da anestezioloq-reanimatoloq ixtisası üzrə internatura keçib. 1997-2019-cu illərdə Azərbaycan Respublikası Müdafiə Nazirliyinin Baş Hərbi Klinik Hospitalında Təxirəsalınmaz Yardım və Anesteziologiya-Reanimasiya şöbəsinin həkim ordinatoru kimi işə başlayıb, daha sonra şöbə rəisi təyin edilib. 2013-2019-cu illərdə Azərbaycan Respublikası Silahlı Qüvvələrdə Baş anestezioloq-reanimatoloq vəzifəsində çalışıb. 2019-cu ildən Mərkəzi Gömrük Hospitalının Reanimasiya və intensiv terapiya şöbəsində anestezioloq-reanimatoloq kimi fəaliyyət göstərir.

Həkim Mərkəzi Gömrük Hospitalında cərrahi əməliyyatlar önü pasiyentlərin ümumi vəziyyətinin qiymətləndirilməsi, anestezioloji taktikanın seçilməsi və aparılması, əməliyyat zamanı pasiyentlərin nəzarətdə saxlanılması, əməliyyatdan sonra intensiv müalicə və müayinə taktikasının seçilməsi və aparılması, əməliyyatdan sonra ağrısızlaşdırma və regional anesteziya prosedurlarını həyata keçirir.

Xəyal Məmmədov özünə qarşı tələbkardır, daim öz üzərində çalışan, dünya mətbuatında qabaqcıl ölkələrin səhiyyə sisteminin və tibbin ən son nailiyyətlərini izləyən və bu təcrübədən bəhrələnən yüksəkixtisaslı mütəxəssisdir. O, 2015-ci ildə Almaniyanın Unna Nevroloji klinikasında nevrologiya üzrə intensiv terapiya kursunda, 2017-ci ildə Almaniyanın Berlin şəhərində Bundeswehrkrankenhaus Şarite klinikasının təhsil bazasında Anesteziologiya-reanimatologiya üzrə ixtisasartırma kursunda, 2019-cu ildə Bakıda ATU-nun və Türkiyənin Ankara Universitetinin təşəbbüsü ilə keçirilmiş “Pediatrik reanimasiya və təcili pediatrik yardım” üzrə təlim kursunda və 2019-cu ildə Türkiyənin Florence Nightingale Xəstəxanalar Qrupunda təkmilləşdirmə kursunda iştirak edib.