"TƏBİB-in tabeliyində olan tibb müəssisələrinin strukturuna daxil olan regional perinatal mərkəzlərinin fəaliyyətinin dəyərləndirilməsi haqqında” TƏBİB-in İcraçı direktoru Vüqar Qurbanovun 23 may 2023-cü il tarixli əmri ilə tibb müəssisələrində perinatal mərkəzlərin fəaliyyətinin dəyərləndirilməsi ilə əlaqədar yaradılmış Komissiyanın üzvləri Sumqayıt Tibb Mərkəzinin (STM) Perinatal Mərkəzini və doğuşayardım mərkəzlərini ziyarət ediblər.

 

STM-dən Aztibb.az-a verilən xəbərə görə, ziyarət zamanı Komissiya tərəfindən analara göstərilən tibbi xidmətin dəyərləndirilməsi və infeksiyaların profilaktikası və infeksion nəzarət qaydalarının tətbiqi, yenidoğulmuşlara göstərilən tibbi xidmətin dəyərləndirilməsi və qaydalarının tətbiqi, kritik durumda daxil olan hamilələrə göstərilən tibbi xidmət, qadın və reproduktiv sağlamlığın qorunmasına yönəlmiş tədbirlərin həyata keçirilməsi, ana ölümlərinin qarşısının alınması məqsədilə aparılmış tədbirlər, eləcə də tibb personalının yenidoğulmuşlara göstərilən tibbi xidmət, qadın və reproduktiv sağlamlıq sahəsində təlimlərdə iştirakı qiymətləndirilib.

 

Tədbir Sumqayıt Dövlət Dram Teatrında davam etdirilib. Sumqayıt Tibb Mərkəzinin direktoru Səkinə Sadıxova gələn qonaqları salamlayıb və keçirilən tədbirin əhəmiyyətindən danışıb. TƏBİB-in İcraçı direktorunun müavini Anar İsrafilov qeyd edib ki, komissiya üzvləri tərəfindən təhlillər aparılıb və qiymətləndirilib.

 

Sumqayıt Tibb Mərkəzinin Perinatal Mərkəzinin rəhbəri, TƏBİB-in tabeliyindəki tibb müəssisələrində hamiləlik, doğuş, zahılıq dövrlərində ana ölümü və erkən neonatal dövrdə körpələrin ölümü və ağırlaşmış doğuş hallarının təhlili üzrə Komissiyanın sədri Təranə Rəcəbli və digər çıxış edənlərin məruzələri dinlənilib.

 

Bundan başqa, neonatal ölümlərin azaldılması istiqamətində görülmüş işlər, yenidoğulmuşların sağlamlığının qorunması məqsədilə skrininq proqramı çərçivəsində göstərilmiş laborator xidmətin təşkili, tibb müəssisələrində keyfiyyətə nəzarət işinin təşkili, tibb personalının sertifikasiya müddətinə və növbətçilik cədvəlinə nəzarət, tibb personalının vəzifə təlimatları barədə məlumatlılıq bazasının yoxlanılması üzrə dəyərləndirilmə aparılıb.