Revmatizmin aktiv dövrü 6-17 yaş arası uşaqlarda olur. Bu dövrdən sonra revmatizm əvvəlki kimi olmur. Yəni, artıq 50-60 yaşlı birində aktiv revmatizm olmur. Bu, çox güman ki, oxşar simptomatikaya sahib digər xəstəliklərdir.

 

 

Bu barədə məlumat verən Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev bildirib ki, revmatizm ürəyi zədələyir.

 

Onun sözlərinə görə, bu pozulma revmokardit adlanır. Revmokardit zamanı ürəyin qişaları – daxili qişa (endokardit), xarici qişa (perikardit) və orta qişası olan ürək əzələsi (miokardit) iltihabi prosesə qoşula bilər.

 

Uzman həkim qeyd edib ki, revmatizm yüngül keçdikdə belə, iltihabi proses ürək qapaqlarını zədələyə bilər. Bu zaman qapaqlar büzülür, dağılır, öz elastikliyini itirir. Nəticədə bu qapaqlar ya tam açılmır, ya da kameralar arasındakı dəliklər tam şəkildə qapanmır:

"Qapaqlarda yaranan qüsur nəticəsində ürək öz fəaliyyətini normal şəkildə icra edə bilmir ki, bu da ağır fəsadların (aritmiya, xroniki ürək çatışmazlığı, tromboemboliya) baş verməsinə səbəb olur".