"Dahi təbiblər" rubrikasında Azərbaycan həkimi və səhiyyə təşkilatçısı, tibb elmləri doktoru, professor və Azərbaycan SSR səhiyyə naziri Hənifə Məmmədağa oğlu Abdullayev haqqında məlumatları təqdim edirik. 

 

O, 1923-cü ildə Lənkəranda anadan olub. Azərbaycan Dövlət Tibb İnstitutunun Sanitariya fakültəsinə qəbul olan Hənifə Abdullayev iki il burada oxuduqdan sonra təhsilini İkinci Moskva Tibb İnstitutunda davam etdirib. Buranı əla qiymətlərlə bitirərək Mərkəzi Hematologiya və Qanköçürmə İnstitutunda şöbə rəhbəri kimi fəaliyyət göstərib.

 

1967-ci ildə Azərbaycanda işləməyə dəvət edilən Hənifə Abdullayev elə həmin il "Hemofilin klinik müalicəsi" mövzusunda doktorluq dissertasiyasını uğurla müdafiə edərək professor elmi adını alıb.

 

1970-1979-cu illərdə Azərbaycan SSR səhiyyə naziri vəzifəsində çalışıb. 1979-cu ildən həyatının sonunadək Azərbaycan Həkimləri Təkmilləşdirmə İnstitutunun Hematologiya kafedrasına rəhbərlik edib.

 

Professor Hənifə Abdullayev 1969-cu ildən Ümumdünya Hemofiliya Assosiasiyasının üzvü olub, ABŞ, Almaniya, Türkiyə, İran, Fransa, Çexoslovakiya və başqa ölkələrdə keçirilmiş tibbi konfranslarda hemofiliya və talassemiyaya dair elmi mühazirələr oxuyub.

 

O, "Qırmızı əmək bayrağı", "Şərəf nişanı" ordenləri, bir sıra medallar, eləcə də Yunanıstanın Qırmızı Xaç Cəmiyyətinin "Qızıl xaç" ordeni ilə təltif edilib.

 

Hənifə Abdullayev 14 mart 1991-ci ildə vəfat edib.