1990-cı ilin avqustunda XX əsrin ortalarının ən nüfuzlu psixoloqlarından biri Burres Frederik Skinner (1904-1990) vəfat edib. O, biheyverizm nəzəriyyəsinin inkişafına və tanınmasına mühüm töhfə verib.

B.Skinneri psixologiyaya rus fizioloqu İvan Petroviç Pavlovun şərti reflekslər haqqında işi, Bertran Rasselin davranış haqqında məqalələri və Con B.Vatsonun ideyaları cəlb edirdi. Fəlsəfə doktoru elmi dərəcəsini aldıqdan sonra B.Skinner tədqiqatlarını davam edir və "Orqanizmlərin Davranışı" (1938) əsərini yazır.

1948-ci ildən Harvard Universitetində psixologiya professoru olduğu müddətdə B.Skinner böyük psixoloqlar nəslinə təsir edir. O, yaratdığı müxtəlif növ eksperimental avadanlıqlardan istifadə edərək, laboratoriya heyvanları üzərində davranışla bağlı tədqiqatlarını aparır. Bunun bariz nümunəsi stolüstü tennis oynamağı öyrənən göyərçinləri idi. Onun ən məşhur ixtiralarından biri olan Skinner qutusu, dərmanların heyvanların davranışını necə dəyişdirə biləcəyini müşahidə etmək üçün əczaçılıq tədqiqatlarında qəbul edilib.