Yeni doğulan körpə qızlarının hər iki böyrəyini itirmə təhlükəsi olduğunu öyrənən valideynlər Mərkəzi Klinikaya müraciət ediblər. Körpədə sidiyə çətinliklə çıxma, qızdırma, qusma, çəki almama, inkişafdan geri qalma var idi.

Mərkəzi Klinikanın uzman uşaq cərrahı Fuad Hüseynov Aztibb.az-a bildirib ki, müayinələr zamanı körpəni bu vəziyyətə salan səbəbin böyrəklərdə ciddi genişlənmə olduğu ortaya çıxıb. Böyrəklərdəki genişlənmənin səbəbi isə sidiyin böyrəyə əks istiqamətdə geri qayıtması (grade 5 VUR) olub:

"Belə gözləmək körpəni incitmək və böyrəyi itirmək demək idi. Ona görə məcburi cərrahi əməliyyat qərarı verildi.

İlkin olaraq, böyrəyi qorumaq üçün sidik axarı müvəqqəti qarnın ön divarına çıxarıldı (Üreterostoma). Körpə qızı qoruma altına alıb böyüməsini gözlədik. 1 yaşı tamam olanda isə sidiyin geriyə qayıtmasının qarşısını almaq məqsədilə cərrahi əməliyyat (Üreteroneosistostomiya) icra etdik".

F.Hüseynov vurğulayıb ki, uğurlu əməliyyatdan 1 həftə sonra körpə tam sağlam şəkildə evə yola salınıb.