TƏBİB ilə “Türkiyə-Azərbaycan İş Adamları və Sənayeçiləri İctimai Birliyi” arasında görüş keçirilib.
Aztibb.az-a TƏBİB-dən verilən məlumata görə, görüşdə çıxış edən TƏBİB-in İcraçı direktorunun müavini Araz Nəsirov TƏBİB-in fəaliyyəti, eyni zamanda dövlət-özəl sektor tərəfdaşlığı modelinin tətbiqi barədə qonaqlara məlumat verib. O qeyd edib ki, ölkədə səhiyyə sisteminin gücləndirilməsi və tibbi xidmətlərə əlçatanlığın təmin olunması ilə əlaqədar TƏBİB tərəfindən mühüm işlər həyata keçirilib.
TÜİB İdarə Heyətinin üzvü, Səhiyyə komissiyasının sədri Ender Kavuk TÜİB-in fəaliyyət istiqaməti barədə məlumat verib, səhiyyənin inkişafı istiqamətində görülən işlərin təqdirəlayiq olduğunu bildirib.
Görüşdə cari ilin sentyabrında ortopediya sahəsi ilə əlaqədar təşkil ediləcək beynəlxalq tibbi konfransla bağlı müzakirələr aparılıb. Həmçinin, TÜİB tərəfindən konfrans iştirakçısı olan həkimlərin 20 DTT balı əldə edəcəyini bildirilib.
Sonda TƏBİB və TÜİB nümayəndələri arasında səhiyyə sahəsində gələcək əməkdaşlığa dair geniş fikir mübadiləsi aparılıb.
