Zaqatala Rayon Mərkəzi Xəstəxanasında Medic School Training Center tərəfindən xəstəxananın həkim və orta tibb heyəti üçün "Amerika Ürək Assosiasiyasının” BLS protokolu üzrə təlim keçirilib.
Xəstəxanadan Aztibb.az-a verilən xəbərə görə, təlimdə “Amerika Ürək Assosiasiyanın” beynəlxalq sertifikatlı təlimçiləri tərəfindən iştirakçılara körpələrdə və böyüklərdə huşun qiymətləndirilməsi, ürək dayanmalarında CPR (ürək ağciyər reanimasiya) tədbirləri, AED (avtomatik xarici defibrilyator) cihazından istifadə qaydaları, effektiv komanda işi, tənəffüs dayanmalarında ilkin müdaxilələr, döş ağrıların idarə olunması və s. mövzular üzrə ətraflı məlumat verilib.
Tibb işçilərinin bilik və bacarıqlarının təkmilləşdirilməsi məqsədilə keçirilən təlimdə iştirakçıların intensiv praktiki bacarıqlarını daha da təkmilləşdirmək üçün protokollara cavab verən xüsusi tibbi avadanlıqlardan istifadə olunub.
Sonda təlimin keçirilməsi ilə əlaqədar yaratdığı şəraitə görə xəstəxana rəhbərliyinə Medic School Training Center tərəfindən təşəkkürnamə, təlim iştirakçılarına isə sertifikatlar təqdim edilib.
