Bu gün görkəmli uroloq-alim və pedaqoq, Əziz Əliyev adına Azərbaycan Dövlət Həkimləri Təkmilləşdirmə İnstitutunun sabiq rektoru, SSRİ məkanında ilk ən güclü uroloji məktəbin yaradıcısı, Əməkdar elm xadimi, akademik Mirməmməd Cavadzadənin anım günüdür.

Aztibb.az xəbər verir ki, Mirməmməd Cavadzadə 1927-ci il mayın 18-də Lənkəran şəhərində anadan olmuşdur. 1948-ci ildə ADTI-nin Müalicə-profilaktika fakultəsini bitirmişdir. 1951-ci ildə II Moskva Tibb İnstitutundakı urologiya kafedrası aspiranturasında oxumuş, 1954-cü ildə "Sidik axarının daşları" mövzusunda namizədlik dissertsiyasını müdafiə etmişdir. 

Mirməmməd Cavadzadə 1948-ci ildə Astara rayonunda cərrah kimi başlamışdır. 1949–1950-ci illərdə Astara birləşmiş rayon poliklinikası və xəstəxanasında baş həkimin müavini işləmiş, 1950–1951-ci illərdə Lənkəran şəhər xəstəxanasında cərrah olmuşdur.

O, 1954-1957-ci illərdə Krım Tibb Institutunda assistent, sonra urologiya üzrə dosent olmaqla, Krım Vilayətinin baş uroloqu işləmişdir. 1962-ci ildə "Böyrəklərin polikistozu" mövzusunda doktorluq dissertasiyası müdafiə edərək tibb elmləri doktoru adı almışdır.

1963-cü ildə Bakıya dəvət olunana alim müsabiqə yolu ilə Ə.Əliyev adına Azərbaycan Dövlət Həkimləri Təkmilləşdirmə İnstitutunun Urologiya və operativ nefrologiya kafedrasına müdir seçilmişdir. 1974-cü ildə həmin institutun rektoru təyin olunmuş və ömrünün sonunadək bu instituta rəhbərlik edərək, qırx beş il ərzində tibb kadrlarının hazırlanması və təkmilləşdirilməsi işinə öz layiqli töhfəsini vermişdir.

Mirməmməd Cavadzadə Azərbaycana qayıtdıqdan sonra yüksək səviyyəli elmi-klinik müəssisə yaratmış və bununla da müasir klinika məktəbinin və urologiya elmində yeni istiqamətin təməlini qoymuşdur. Onun rəhbərliyi ilə bir neçə xəstəxananın urologiya şöbələri birləşdirilmiş və respublikada urologiya və onunla əlaqədar elmlərin inkişafına təkan verilmişdir.

O, urologiyanın problemlərinə həsr edilmiş 34 monoqrafiya və dərs vəsaitinin, 700-dən artıq elmi məqalənin müəllifidir. Uroloq alimin əsərləri respublikamızda və onun hüdudlarından kənarda mütəxəssislər tərəfindən yüksək qiymətləndirilmişdir. Mirməmməd Cavadzadənin rəhbərliyi altında 17 elmlər doktoru, 73 elmlər namizədi, yüzlərlə yüksəkixtisaslı uroloq-həkim yetişmişdir. 1966-cı ildə məhz onun təşəbbüsü və iştirakı ilə Bakıda Respublika Klinik Uroloji Xəstəxana yaradılmışdır. Qısa müddət ərzində urologiya sahəsində elmi və praktik fəaliyyətin mötəbər mərkəzinə çevrilən bu xəstəxana Azərbaycan səhiyyə sistemində xüsusi yer tutur.

1964-cu ildə professor elmi adını alan Mirməmməd Cavadzadə 1967-ci ildə AMEA-nın həqiqi üzvü seçilmişdir. 

Alim həm də respublikada ictimai xadim kimi də yaxşı tanınırdı. O, 9–12-ci çağırışlar Azərbaycan Respublikası Ali Sovetinin deputatı olmuş, Azərbaycan-Fransa Dostluq Cəmiyyətinin, Azərbaycan Uroloqlar Cəmiyyətinin, digər ictimai birlik və qurumların sədri kimi fəaliyyət göstərmişdir.

Mirməmməd Cavadzadənin xidmətləri dövlət tərəfindən yüksək qiymətləndirilmişdir. O, bir sıra orden və medallara layiq görülmüş, o cümlədən müstəqil Azərbaycan Respublikasının ali mükafatları – "Şöhrət" və "İstiqlal" ordenləri ilə təltif edilmiş, Azərbaycan SSR Əməkdar elm xadimi fəxri adına layiq görülmüşdür.

Mirməmməd Cavadzadə 2008-ci il avqustun 7-də vəfat etmiş, I Fəxri Xiyabanda dəfn olunmuşdur.

Respublika Kliniki Uroloji Xəstəxanasına Mirməmməd Cavadzadənin adı verilmişdir.