"Dahi təbiblər" rubrikasında Azərbaycan SSR  Əməkdar elm xadimi, Əməkdar həkim, tibb elmləri doktoru, professor Sona Axundova haqqında məlumatları təqdim edirik. 

 

Professor Sona Axundova 1896-cı ildə Şamaxı şəhərində anadan olub. 1923-cü ildə II Moskva Dövlət Universitetinin Tibb fakültəsini bitirib. Bakıda göz xəstəxanalarında həkim (1923-38), baş həkimin müavini (1938-46) vəzifələrində çalışıb.

 

O, Azərbaycan Həkimləri Təkmilləşdirmə İnstitutunun göz xəstəlikləri kafedrasının assistenti (1935-1949 fasilələrlə), dosenti (1949-54), professoru (1954-70), elmi məsləhətçi-professoru (1970-82), eyni zamanda Azərbaycan Elmi-Tədqiqat Oftalmologiya İnstitutunda şöbə müdiri (1947-53) vəzifələrində işləyib.

 

Sona Axundova1940-cı ildə Odessada V. P. Filatovun rəhbərliyi altında fəaliyyət göstərib, sonra Azərbaycanda Filatov üsulu ilə toxuma terapiyası və keratoplastika əməliyyatları aparmağa başlayıb.

1952-1982-ci illərdə respublikanın baş oftalmoloqu olub.

 

Alimin tədqiqatları əsasən keratoplastika, toxuma terapiyası, traxoma və s. göz xəstəliklərinin müalicəsinə həsr olunub.

 

Professor Sona Axundova Lenin ordeni, Qırmızı Әmək Bayrağı ordeni ilə təltif edilib. 1960-cı ildə Azərbaycyan SSR-in əməkdar həkimi, 1964-cü ildə Azərbaycan SSR əməkdar elm xadimi adlarına layiq görülüb.

 

O, 1982-ci ildə Bakı şəhərində vəfat edib.