İcbari Tibbi Sığorta üzrə Dövlət Agentliyinin təsdiq etdiyi keyfiyyət standartlarının tətbiqi ilə əlaqədar “Neftçala Rayon Mərkəzi Xəstəxanası” Publik Hüquqi Şəxsində TƏBİB-in təşkilatçılığı ilə işçilərə Təməl (BLS) həyat dəstəyi təlimlərinə start verilib. Bu məqsədlə xəstəxananın 500 nəfərlik tibbi və qeyri tibbi işçilərinin bilik və bacarıqlarının artırılması nəzərdə tutulub.

 

Agentlikdən Aztibb.az-a verilən məlumata görə, təlimlərin başlanması ilə əlaqədar Neftçala RMX PHŞ-nin direktoru Elman Quliyev təlim iştirakçılarını təbrik edib, bu cür təlimlərin həyata keçirilməsinin vacib olduğunu vurğulayıb. O, təlimdə iştirak edənlərə müvəffəqiyyətlər arzulayıb.

 

İlkin olaraq xəstəxananın Reanimasiya İntensiv Terapiya Anesteziya şöbəsinin (RİTAŞ), Təcili və Təxirəsalınmaz Tibbi Yardım Stansiyasının (TTYS) tibbi və qeyri tibbi personalı təlimlərə cəlb olunub. Təlimi Təkmil həyat dəstəyi (ALS) sertifikasiyasını almış xəstəxananın TTTYS-nın həkimi Pərviz Salayev və Keyfiyyətin idarə olunması üzrə rəhbər Zəminə Abbasova keçirib. Təlim zamanı təcili və təxirəsalınmaz halların idarə edilməsinə aid nəzəri məlumatlar verilib, kritik hallar zamanı təcili yardımın müasir protokolları dinləyicilərə çatdırılıb.

 

Növbəti mərhələdə isə slaydlarla, mulyaj və manekenlər üzərində ürək masajı, süni tənəffüs və s. kimi praktiki bacarıqların düzgün qaydada icra texnikaları öyrədilib. Bununla yanaşı, təlimdən əvvəl və sonra müasir protokollar əsasında hazırlanmış testlər vasitəsilə iştirakçıların bilik və bacarıq səviyyələrinin dəyərləndirilməsi aparılıb. Təlimdə iştirak edənlər praktiki olaraq təlimdə mənimsədiklərin icra ediblər.