Oğuz Rayon Mərkəzi Xəstəxanasının tabeliyində olan kənd həkim və tibb məntəqələrində əhaliyə göstərilən tibbi xidmətlərin yaxşılaşdırılması və mövcud çatışmazlıqların aradan qaldırılması məqsədilə Tibbi şuranın növbəti iclası keçirilib.

Xəstəxanadan Aztibb.az-a bildirilib ki, tədbirdə Oğuz Rayon Mərkəzi Xəstəxanasının direktoru Anar Əzizov, İlkin Səhiyyə Xidmətinin rəhbəri Nəzakət Qədirova, SİHİ-nin sədri Qorxmaz Hümmətli, Gigiyena və Epidemiologiya Mərkəzinin həkimi Səbahət Vahabova və Oğuz RMX-nın tabeliyində fəaliyyət göstərən kənd həkim və tibb məntəqələrinin işçiləri iştirak ediblər.

İclasda Oğuz RMX-nin direktoru Anar Əzizov kənd həkim və tibb məntəqələrinin qarşısında duran vəzifələrə dair çıxış edib.

Daha sonra İSX-nın şöbə müdiri Nəzakət Qədirova İlkin Səhiyyə Xidmətinin fəaliyyəti, patronaj xidməti, eləcə də uşaqlar arasında profilaktik peyvəndləmə və dispanserizasiyanın aparılması barədə fikirlərini bölüşüb.

Sonda GEM-in həkimi Səbahət Vahabova isə "Tibbi tullantıların idarə olunması" mövzusunda məruzə ilə çıxış edib.