Bakı Sağlamlıq Mərkəzində (BSM) Ümumdünya Hepatit Gününə həsr olunan tədbir keçirilib.

 

Mərkəzdən Aztibb.az-a bildirilib ki, tədbir BSM və “Azərbaycan Qastroenteroloqlar və Hepatoloqlar” İctimai Birliyinin birgə təşkilatçılığı ilə baş tutub.

 

Qaraciyər xəstəlikləri mərkəzinin şöbə rəhbəri, t.ü.f.d. Gülnarə Ağayevanın moderatoru olduğu konfransda müvafiq sahənin yüksəkixtisaslı mütəxəssisləri tərəfindən “Xroniki B, C, B+D hepatitinin diaqnostika və müalicələri”, “Qaraciyər sirrozların müalicəsi” və “Toksiki hepatitlərin müalicəsi” mövzusunda məruzələr dinlənilib, panel müzakirələri aparılıb.

 

Bildirilib ki, hər il iyulun 28-i bütün dünyada Ümumdünya Hepatit Günü kimi qeyd edilir. Bu günün məqsədi dünya əhalisini hepatit virusları barədə məlumatlandırmaq, bu amansız xəstəliyə qarşı mübarizə səylərini gücləndirməyə çağırmaqdır.