Çində Paytaxt Tibb Universitetinin nevroloqları 19 yaşlı yerli sakinə Alzheimer xəstəliyi diaqnozu qoyublar.

Aztibb.az xəbər verir ki, "Journal of Alzheimer's Disease" jurnalının məlumatına görə, o, bu xəstəliyə tutulan ən gənc xəstə hesab edilir.

Gənc adam konsentrasiya problemindən şikayətləndikdən sonra həkimlər onun Alzheimer xəstəliyindən şübhələniblər. Məlum olub ki, xəstəliyin əlamətləri onda 17 yaşında görünməyə başlayıb.

Zaman keçdikcə gənc daha da pisləşib. Nəticədə o, qısamüddətli yaddaş itkisi, oxumaqda və emosiyaları ifadə etməkdə çətinlik çəkib.

Qazanılmış demensiyanı müəyyən etmək üçün testlərdən keçdikdən sonra ona rəsmi diaqnoz qoyulub. Eyni zamanda, həkimlər gəncin erkən yaddaş itkisinə cavabdeh olan genlərin işində heç bir pozğunluğun olmadığını müəyyən ediblər.

19 yaşlı gəncin ailə üzvlərinin heç birində də demans xəstəliyi olmayıb. Buna görə də, vəziyyət həkimlər arasında çaşqınlığa səbəb olub.