Bu barədə Aztibb.az-a ümumi cərrah, Mərkəzi Gömrük Hospitalının Cərrahiyyə şöbəsinin müdiri, t.ü.f.d. Namiq Novruzov parazitar xəstəliklərə yoluxmalar və qurdlardan qorunmağın yolları haqqında danışarkən məlumat verib.

Həkim bildirib ki, insanlar gigiyenik qaydalara əməl etmədikdə bu xəstəliyə yoluxurlar. Bu baxımdan yuyulmamış göyərti və meyvələr potensial xəstəlik mənbəyi sayılmalıdır. Aralıq sahibin həzm sisteminə düşən qurd yumurtalarından çıxan sürfələr qana keçir və axınla qaraciyərə çatır. Qaraciyər süzgəcindən keçə bilməyən törədicilər burada sist və ya qovuqcuqlu formada xəstəlik yaradır. Qaraciyəri adlayan sürfələr isə digər orqanlarda - beyin, ağciyərlər, ürək və skelet əzələlərində xəstəlik yarada bilər.

 

Onun sözlərinə görə, qaraciyər exinokoku çox zaman hər hansı bir şikayət yaratmır. Bəzi hallarda digər orqanların müayinəsi zamanı aşkar olunur. Parazit qaraciyərin içində yavaş-yavaş inkişaf edərək qaraciyərin böyüməsinə səbəb olur. Bu zaman sağ qabırğa altında ağrıların olması ola bilər. Bəzən exinokok kistası öd yollarına təzyiq göstərərək sarılıqla da özünü göstərir:

 

"Cərrahi müalicə bu xəstəliyin əsas müalicə üsuludur. Qaraciyərdə exinokokk sistləri Mərkəzi Gömrük Hospitalında laparoskopik yolla əməliyyat icra edilməklə aradan qaldırılır. Qaraciyər exinokoku kistasına tutulmamaq üçün sadəcə gigiyena qaydalarına riayət etmək kifayətdir. Bazarlarda, marketlərdə meyvə və tərəvəzləri təmiz yumadan yemək məsləhət deyil".