Zaqatala rayonunun Qəbizdərə kəndində çətin relyefli dağlıq-meşəlik ərazidə köməksiz vəziyyətdə qalaraq təxliyə olunan turistlərin vəziyyəti stabildir.

Bu barədə Aztibb.az TƏBİB-dən məlumat verilib.

Bildirilib ki, iki nəfər Bakı sakini - Əli Əlizadə və Əbdül Rzayev – uzun axtarışlardan sonra təxliyə olunub.

Onlara TƏBİB-in tabeliyindəki Zaqatala Rayon Mərkəzi Xəstəxanasının Təcili yardım şöbəsində zəruri tibbi xidmət göstərilib, laboratoriya, instrumental müayinələr təmin olunub. Kəskin travmatik xəsarətləri yoxdur, hazırda stressə və hipovolemiyaya (damardaxili sistemdə mayenin miqdarının azalması – red.) qarşı yardım edilir.

Əbdül Rzayevə aşıq-baldır oynağının əziyi diaqnoz qoyulub və tibbi yardım göstərilib.

Ümumi vəziyyətləri stabil olaraq qiymətləndirilir.

Həkim müşahidəsi altındadırlar.