AR Səhiyyə Nazirliyi Milli Hematologiya və Transfuziologiya Mərkəzinin Talassemiya bölməsi tərəfindən Mingəçevir şəhərində talassemiya pasiyentləri və onların ailələri üçün “Pasiyent məktəbi” adlı maarifləndirici tədbir keçirilib.

Aztibb.az-a Mərkəzdən bildirilib ki, tədbir Azərbaycan Talassemiya Federasiyası və “Novartis Azerbaijan” şirkətinin dəstəyi ilə baş tutub.

Tədbirdə Milli Hematologiya və Transfuziologiya Mərkəzinin Sümük iliyi transplantasiyası şöbəsinin müdiri, həkim-hematoloq Nərgiz Əliyeva talassemiyanın müalicəsi ilə bağlı təqdimatla çıxış edib. Həmçinin Azərbaycan Talassemiya Federasiyasının Şəki bölgəsi üzrə nümayəndəsi Vasif Əlizadə Azərbaycan Talassemiya Federasiyasının əsas fəaliyyət istiqamətləri, habelə pasiyentlərin keyfiyyətli, əlçatan və vaxtında müalicə almaq hüququndan danışıb.

Maarifləndirici tədbir çərçivəsində pasiyentlər və onların ailələri talassemiyanın yaranma səbəbləri və əlamətləri, bu xəstəliyin diaqnostika və müalicə üsulları, eləcə də sümük iliyinin transplantasiyasının imkanları haqqında məlumat alıblar.