TƏBİB-in tabeliyindəki Sumqayıt Tibb Mərkəzinin (STM) Uşaq Xəstəxanasında laborator analizlərdəki yeniliklər və analizlərin rasional qaydada seçilməsinin təkmilləşdirilməsi məqsədilə təşkil olunan silsilə tədbirlər çərçivəsində növbəti seminar keçirilib.

STM-dən Aztibb.az-a bildirilib ki, tibb müəssisələrinin pediatrlarının qatıldığı seminarda uzman pediatr Müşviq Ramazanov “Uşaqlarda hepatosplenomeqaliya və laborator diaqnozu” mövzusunda təqdimatla çıxış edib. O, bu sahədə olan yenilikləri seminar iştirakçılarının diqqətinə çatdırıb.

Qarşılıqlı fikir mübadiləsi şəraitində keçən tədbirdə həkimləri maraqlandıran suallar cavablandırılıb.

Qeyd edək ki, seminarlar TƏBİB-in laboratoriya işçi qrupu, Sumqayıt Tibb Mərkəzi və Azərbaycan Klinik Laboratoriya Mütəxəssisləri İctimai Birliyinin (AZKLMİB) birgə təşkilatçılığı ilə keçirilir.