Hemodializ mərkəzlərinin fəaliyyətinin tənzimlənməsi və müvafiq tibbi xidmətlərin təkmilləşdirilməsi məqsədilə TƏBİB-in nəzdində yaradılan “Xroniki böyrək çatışmazlığından əziyyət çəkən şəxslərə göstərilən tibbi xidmətlərin keyfiyyətinin artırılması və müalicəsinin təşkilinin təkmilləşdirilməsinə dair Komissiya”nın üzvləri tərəfindən TƏBİB tabeliyində olan region hemodializ mərkəzlərinin fəaliyyətinin dəyərləndirilməsi prosesinə başlanılıb.
Bu barədə Aztibb.az-a TƏBİB-dən bildirilib.
Qeyd olunub ki, müvafiq fəaliyyət çərçivəsində hemodializ mərkəzlərinin mövcud vəziyyətinin qiymətləndirilməsi, xidmətin keyfiyyətinin yüksəldilməsi, əhaliyə əlçatan tibbi xidmətlərin təmin edilməsi prioritet istiqamətlər olaraq seçilib.
"Xroniki böyrək çatışmazlığından əziyyət çəkən şəxslərə göstərilən tibbi xidmətlərin keyfiyyətinin artırılması və müalicəsinin təşkilinin təkmilləşdirilməsi üzrə Komissiyanın“ üzvləri olan TƏBİB-in İxtisaslı tibbi yardım departamentinin Xüsusi profilli xidmətlərin təşkili şöbəsinin böyük məsləhətçisi Ceyran Abdullayeva və Kliniki Tibb Mərkəzin Nefrologiya və Hemodializ şöbəsinin müdiri Xəyalə Quluzadə Göygöl Rayon Mərkəzi Xəstəxanasının Hemodializ şöbəsini ziyarət ediblər.
Ziyarət zamanı tibb müəssisəsinin rəhbərliyi, müvafiq şöbə müdirləri və məsul tibb işçiləri ilə birlikdə hemodializ şöbəsinin ümumi fəaliyyəti, xəstələrə göstərilən tibbi xidmətin keyfiyyəti dəyərləndirilib.
Hemodializ şöbələrində işin təşkili istiqamətində müxtəlif təlimatlar verilib, tibbi personal tərəfindən ünvanlanan suallara aydınlıq gətirilib, irəli sürülən təkliflər dinlənilib. Tibbi xidmətin keyfiyyətinin və əlçatanlığının təmin edilməsi istiqamətində fəaliyyətlərə dair müzakirələr aparılaraq, tibb müəssisə rəhbərlərinə və şöbə müdirlərinə zəruri tapşırıqlar və tövsiyələr verilib.
