İlkin səhiyyə xidmətində inzibati idarəetmə sisteminin təkmilləşdirilməsi, sənəd dövriyyəsinin asanlaşdırılması, müasir dövrün tələblərinə çatdırılması və inkişaf etdirilməsi məqsədi ilə TƏBİB-in tabeliyində fəaliyyət göstərən Bakı Baş Səhiyyə Mərkəzində "Elektron sənəd dövriyyəsi (ESD) işinin təşkili" ilə bağlı təlim keçirilib.

 

Mərkəzdən Aztibb.az-a verilən xəbərə görə, müəssisənin müxtəlif departament, şöbə rəhbərləri və əməkdaşlarının, həmçinin tabeli tibb müəssisələrinin nümayəndələrinin iştirak etdiyi təlimi TƏBİB-in Ümumi şöbəsinin müdiri Şəmsi Gülverdiyev aparıb.

 

Elektron sənəd dövriyyəsinin önəmindən bəhs edən Ş.Gülverdiyev qeyd edib ki, sənədlərin elektron qaydada dövriyyəsi günümüzün aktual tələblərindən biridir və TƏBİB bu istiqamətdə çox ciddi addımlar atıb.

Yaxın gələcəkdə bütün tabeli qurumlarda hər bir sənədləşmə və sənəd dövriyyəsi yalnız bu sistem vasitəsi ilə həyata keçiriləcək:

 

“Artıq uzun bir müddətdir ki, TƏBİB “Elektron sənəd dövriyyəsi”ndən istifadə edir. Bu, bizim işimizi olduqca asanlaşdıran bir sistemdir. Hazırda bu Mərkəz və onun tabeliyindəki tibb müəssisələrində də sistemin mərhələli şəkildə tədbiqinə başlanılıb. Hələ ki, BBSM-nin 6 tibb müəssisəsində elektron sənəd dövriyyəsi tətbiq edilir. Yaxın gələcəkdə bu müəssisələrin sayı artırılacaq və bu da bizə imkan verəcək ki, TƏBİB-lə Mərkəz, Mərkəzlə tabeli müəssisələri və digər qurumlar arasında sənədləşmələr daha qısa zaman kəsimində həyata keçirilsin”.

 

Bildirilib ki, 2022-ci ilin fevral ayından etibarən Bakı Baş Səhiyyə Mərkəzində sənəd dövriyyəsi prosesi məhz “e-gov.az” portalı vasitəsilə elektron şəkildə aparılmağa başlayıb. Bunun nəticəsində də sənədlərin qeydiyyatı, çatdırılması və sistem vasitəsilə göndərilməsi sahəsində həm operativlik təmin edilib, həm də resurslara qənaət edilib.

 

Nəzəri və praktiki hissələrdən ibarət olaraq keçirilən təlimdə sənədlərin aidiyyəti üzrə düzgün qəbulu, emalı, göndərilməsi zamanı diqqət yetirilməli məqamlar barədə ətraflı məlumat verilib, yarana biləcək məsələlərə aydınlıq gətirilib.

 

Sonda təlim iştirakçılarını maraqlandıran suallar cavablandırılıb.