Yoluxmanın artmasının əsas səbəbi son vaxtlar torpaqlarımızın işğaldan azad edilməsi ilə bağlı savaş fonunda pandemiyanın unudulmasıdır.

Bunu Aztibb.az-a açıqlamasında Tibb elmləri doktoru, professor Adil Qeybulla koronavirusa yoluxanların sayında artımın olmasına münasibət bildirərkən deyib.

O, qeyd edib ki, insanların ruh yüksəkliyi anlaşılandır, lakin pandemiyanı da unutmaq olmaz:

“COVID-19 pandemiyası kimi bütün dünyanı aciz qoyan bir problemlə üz-üzəyik. Müharibə üçün arxa cəbhə var, lakin xəstəlik üçün arxa cəbhə yoxdur. Biz pandemiya ilə bağlı ciddi problemlə üzləşsək, bu, bizim ön cəbhədəki uğurlarımıza da pis təsir edəcək. Ona görə də bu məsələyə ciddi yanaşılmalıdır. Vətəndaş məsuliyyəti ortaya qoyulmalıdır. Qapalı mühitdə karantin qaydalarına riayət edilməlidir”.

Professor pandemiyanın unudulmaması üçün televiziyaların da rolunun böyük olduğunu vurğulayıb:

“Son vaxtlar ümumiyyətlə pandemiya ilə bağlı televiziya ekranlarında heç bir məlumat verilmir, maarifləndirmə və təbliğat işləri aparılmır. Bu da cari vəziyyətə təsir edir”.

“Nəzərə almaq lazımdır ki, elan edilən rəqəmlər real vəziyyəti əks etdirmir. Əslində vəziyyət daha ciddidir. Çünki xəstələrin böyük qrupu evdə müalicə olunur və onlar qeydiyyata düşmürlər”, - Adil Qeybulla qeyd edib.