Qarabağın yenidən qurulması çərçivəsində bu ilin yanvarında Ağalı kəndinə köçürüləcək 20 ailənin, 94 nəfərin 3 müəssisədə tibbi müayinəsi təşkili edilib. Apreldə Laçın şəhərinə köçürüləcək 1203 vətəndaşın ölkənin 26 tibb müəssisəsində müayinəsi icra olunub.

Aztibb.az-ın məlumatına görə, bunu Mətbuat Gününə həsr olunmuş tədbirdə TƏBİB-in İcraçı direktoru Vüqar Qurbanov bildirib.

İcraçı direktor qeyd edib ki, Laçın Rayon Mərkəzi Xəstəxanasının strukturunda Laçın Ailə Sağlamlıq Mərkəzi, Tərtər Rayon Mərkəzi Xəstəxanasının strukturunda Talış Ailə Sağlamlıq Mərkəzi yaradılıb. Bundan başqa, bir sıra tabeli tibb müəssisələrində təmir-bərpa işləri aparılıb, yeni şöbələr istifadəyə verilib. Saray Modul tipli Vərəm Əleyhinə Xəstəxananın açılışı baş tutub.

Bildirilib ki, fevral ayında Lənkəran Rayon Mərkəzi Xəstəxanasında ilk dəfə İnvaziv kardiologiya və Ürək-damar cərrahiyyəsi şöbələrinin açılışı olub və hazırda Şəki, Şirvan kimi bölgələrdə də belə şöbələr yaradılır.

V.Qurbanov, həmçinin Xətai Tibb Mərkəzində doğum və ginekologiya şöbələri və Nizami Tibb Mərkəzində cərrahiyyə şöbəsinin istifadəyə verildiyini deyib.