TƏBİB-in tabeliyində fəaliyyət göstərən “Yeni klinika” tibb müəssisəsində ilk dəfə olaraq icbari tibbi sığortanın Xidmətlər Zərfi daxilində total bud-çanaq protezləşdirilməsi (artroplastika) əməliyyatı icra olunub.

 

Bu barədə Aztibb.az-a Klinikadan xəbər verilib.

 

Bildirilib ki, tibb müəssisəsinə sol bud-çanaq oynağında ciddi ağrı, aşağı ətraflarda 5 sm uzunluq fərqi, gəzə bilməmək şikayətləri ilə müraciət edən 58 yaşlı kişi xəstəyə aparılan müayinələrdən sonra soltərəfli 4-cü dərəcə bud-çanaq oynağı artrozu diaqnozu qoyulub.

 

Travmatoloq-ortoped Tural Behbudsoyun uğurla icra etdiyi total bud-çanaq protezləşdirilməsi əməliyyatından sonra xəstənin ağrıları tamamilə azalaraq uzunluq fərqi aradan götürülüb.

 

Aktiv həyatına geri dönən xəstə daha sonra ambulator müalicə üçün evə buraxılıb.

 

Qeyd edək ki, bud-çanaq oynağının total protezləşdirilməsi (artroplastikası), bud-çanaq oynağı ağır dərəcədə zədələnmiş xəstələrdə oynağın süni bir oynaqla dəyişdirilməsi əməliyyatıdır.