Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi, Milli Məclisin Səhiyyə Komitəsinin sədr müavini, t.e.d. Rəşad Mahmudov və Mərkəzi Gömrük Hospitalının kardioloqu Günay Hətəmova Bakıda keçirilən “Ürək-damar xəstəliklərinin müasir aspektləri” adlı elmi-praktik konfransda iştirak ediblər.

 

Mərkəzi Gömrük Hospitalından Aztibb.az-a bildirilib ki, tədbir Türkiyənin Bayraktar Group Sağlamlıq Turizm Şirkətinin təşkilatçılığı, Azərbaycan Respublikasının Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB, İctimai Səhiyyə və İslahatlar Mərkəzinin dəstəyi ilə baş tutub.

 

Konfransın keçirilməsində məqsəd ürək-damar problemlərinin müalicəsinin daha əlçatan və asan olmasının təmin edilməsi olub.

 

Tədbirdə “Ürək çatışmazlığında koronar revaskulyarizasiyanın bu günü və gələcək istiqamətləri”, “Ürək qapağı xəstəliklərinin cərrahi müalicəsi” və digər mövzular türk və yerli mütəxəssislər tərəfindən müzakirə edilib.

 

Ürək-damar cərrahı, t.e.d. Rəşad Mahmudov çıxışında səhiyyə sahəsindəki əməkdaşlığın xalqlarımızın sağlamlığına və insan kapitalının inkişafına dəstək olduğunu vurğulayıb. Bildirib ki, Bayraktar Sağlıq Turizm Şirkətinin Azərbaycana gəlməsi qardaşlığımıza daha bir dəstəkdir.

 

Qeyd edək ki, ölkəmizdə həyata keçirilən səhiyyə islahatlarının ən vacib sahələrindən biri olan ürək-damar xəstəlikləri ilə mübarizədə ölkəmiz daha da böyük uğurlara nail olacaq. Azərbaycan səhiyyəsində ürək-damar xəstəlikləri sahəsində fəaliyyət göstərən həkimlərin həyata keçirdiyi işlər bu gün həm ölkəmizdə, həm də dünyada söz sahibi olacaq qədər güclüdür.