Xalyazion göz qapağındakı kirpik kisəsinin və ya piy vəzisinin kəskin irinli iltihabıdır. Göz qapağının şişməsi ilə başlayır. Müayinə zamanı kiçik nödül görmək mümkündür.

Bu barədə Aztibb.az-a Referans Estetik Mərkəzinin peşəkar oftalmoloqu Səlahəddin Təhməzov məlumat verib.

Həkim bildirib ki, xalyazionun diaqnozu alətlər vasitəsilə dəqiqləşdirmə tələb etmir. Üzdən müayinə zamanı problemi müşahidə etmək mümkündür:

"Xalyazionun yarandığının ilkin mərhələsində müalicə etmək mümkündür. Amma ağırlaşmış formada cərrahi müdaxilə tələb edir".

Onun sözlərinə görə, xəstəlik əksər hallarda immuniteti zəifləmiş olan insanlarda (adətən uşaqlarda) və ya badamcıqlarının, burunun əlavə boşluqlarının iltihabı, dişlərdə olan xəstəliklər, qurd invaziyaları, şəkərli diabet və s. xəstəliklər fonunda baş verir.

Səlahəddin Təhməzov qeyd edib ki, xalyazion yenidən əmələ gələ bilər. Onun əmələ gəlməsinə bir çox faktorlar təkan verir – soyuqlama, immunitetin zəifləməsi, kontakt linzaların taxılması, şəkərli diabet, yağlı dəri, qiqiyenik qaydalarına tam riayət edilməməsi və s.

"Xalyazion tez-tez əmələ gəlirsə mütləq immun sisteminizi möhkəmləndirin. Bunun üçün vitamin-mineral kopleksləri qəbul etmək, açıq havada gəzmək, yaxşı qıdalanmaq lazımdır", - deyə oftalmoloq bildirib.