2019-cu ildə ailəvi hiperlipidemiya diaqnozu ilə Mərkəzi Gömrük Hospitalına müraciət etmiş 5 yaşlı pasiyentin müayinəsi nəticəsində ürəyin tac damarlarında həyati təhlükə yaradan 95% darlıq aşkarlanmışdır. Lakin bu xəstəliyin səbəbi qaraciyərdə lipid mübadiləsi pozğunluğu olduğundan müalicə qaraciyər transplantasiyası idi. Konsiliumun nəticəsinə görə pasiyentə eyni seansda ürək damarlarının dəyişdirilməsi (conorary by-pass) və qaraciyər transpantasiyası əməliyyatına qərar verildi.
Bu barədə Aztibb.az-a Mərkəzi Gömrük Hospitalından məlumat verilib.
Bildirilib ki, 13 noyabr 2019-cu il tarixində tanınmış ürək-damar cərrahı, t.e.d. Rəşad Mahmudov və komandası tərəfindən süni qan dövranı cihazına girilmədən ürəyin tac damarının dəyişdirilməsi (coronary by-pass) müvəffəqiyyətlə icra olunub. Ardından ümumi-cərrah, cərrah-transplantoloq, t.f.d. Mircəlal Kazımi və komandası tərəfindən əmisinin donorluğu ilə 5 yaşlı pasiyentə qaraciyər transplantasiyası icra edilib.
Bu əməliyyat yazılı dünya tibb ədəbiyyatında ilk icra olunan əməliyyat kimi “Elsevier” nəşriyyat evinə daxil olan nüfuzlu “Transplantation Proceedings” jurnalında dərc olunub.
Uğurumuzun davamı ondan ibarətdir ki, ən nüfuzlu jurnallardan biri olan “Nature” jurnalında 2023-cü ildə yayımlanan “Concurrent Living Donor Liver Transplantation and Off-Pump Coronary Artery Bypass in a Five-Year-Old Child With Homozygous Familial Hypercholesterolemia” xəstəliyinin müalicə protokolunda eyni seansda 5 yaşlı uşaq üzərində icra olunan coronary by-pass və canlıdan canlıya qaraciyər transplantasiyası bu xəstəliyin müalicə üsulu kimi təklif edilərək protokola daxil edilib və istinad olunub.