TƏBİB əməkdaşları və 10 tabeli tibb müəssisəsinin 13 həkim-mütəxəssisi Koreya Beynəlxalq Əməkdaşlıq Agentliyi tərəfindən Yeungnam Universitetində təşkil olunan “Yoluxucu xəstəliklərin qarşısının alınması təlimi”ndə iştirak edirlər.

 

Aztibb.az-a TƏBİB-dən bildirilib ki, 21 iyun - 4 iyul tarixlərini əhatə edən təlim Koreya Respublikasının Daegu şəhərində keçirilir.

 

TƏBİB-in Tibbi xidmətlərin inkişafı departamentinin əməkdaşı Fərhad Sinqatulov, Beynəlxalq əməkdaşlıq departamentinin əməkdaşı Uğur Cəfərzadə və tabeli tibb müəssisələrinin əməkdaşları yoluxucu xəstəliklərin qarşısının alınması və idarəedilməsi ilə bağlı aktiv müzakirələrə qatılıblar.

 

Təlimin məqsədi Koreyanın yoluxucu xəstəliklərlə mübarizədə əldə etdiyi nailiyyətləri və təcrübəni bölüşmək, həmçinin yeni metodların tətbiqinə dair ümumi təlimat verməkdir.

 

Qeyd edək ki, təlimdə Azərbaycanda COVID-19 ilə mübarizədə görülən tədbirlər və hazırda infeksion nəzarətin təşkili üzrə aparılan işlər barədə ölkə hesabatı da təqdim olunub və hesabat yüksək qiymətləndirilib.