Dünyadakı Azərbaycanlı Təbiblərin Simpoziumunun (DATS) bağlanış mərasimi keçirilib.

Aztibb.az-a TƏBİB-dən bildirilib ki, tədbiri giriş sözü ilə açan qurumun İcraçı direktoru Vüqar Qurbanov simpoziumun yüksək səviyyədə keçməsindən məmnunluğunu dilə gətirib:

Bildirib ki, 14 ölkə, xaricdə yaşayan 120 azərbaycanlı təbib, 6 gün, 5 şəhər, 64 məruzə, 14 yerli və beynəlxalq tibbi cəmiyyətlə memorandum, 1 500-dən çox iştirakçı və akkreditasiya olunmuş 28 DTT krediti ilə Dünyadakı Azərbaycanlı Təbiblərin I Simpoziumu çox yüksək nəticələrlə öz işini yekunlaşdırır.

Vüqar Qurbanov xaricdə yaşayan azərbaycanlı həkimləri vətəndə fəaliyyət göstərməyə çağırıb:

“Ölkə Prezidenti cənab İlham Əliyevin diqqət və qayğısı ilə əhatə olunan səhiyyə sahəsində davamlı islahatlar həyata keçirilir. Qarşıya qoyulan hədəflər isə çoxdur. Bu istiqamətdə görüləcək işlərdə Azərbaycanda çalışan həkimlərimiz sırasında sizi də görməkdən məmnun olarıq. Dünyanın müxtəlif ölkələrində Azərbaycan səhiyyəsinə öz töhfələrinizi verməyə çalışırsınız, əminəm ki, vətəndən kənarda ölkəmizi layiqli şəkildə təmsil edirsiniz”.

Tədbirdə elmi panellərdə moderator, ekspert və məruzəçi qismində iştirak edən Azərbaycanda və xarici ölkələrdə çalışan həkimlərə sertifikatlar təqdim olunub.

Bağlanış mərasimi bədii hissə ilə davam edib. Bədii hissədə tanınmış tarzən, əməkdar artist Şəhriyar İmanov musiqili proqramla çıxış edib.