Aztibb.az-a TƏBİB-dən bildirilib ki, proqramın 21 iyun tarixində keçirilən panellərindən biri “Qadın sağlamlığı: problemlər və perspektivlər” mövzusunda olub. Müzakirə tibb elmləri üzrə fəlsəfə doktoru, mama-ginekoloq İlham Qafarovun moderatorluğu, tibb elmləri doktoru, professor, mama-ginekoloq İslam Mahalovun iştirakı ilə baş tutub. Sessiyada xaricdən gələn azərbaycanlı təbiblərdən Türkiyədə fəaliyyət göstərən Məlahət Atasevər ‘’Qadınlarda servikal xərçəngönü xəstəliklər: HPV skrininq və servikal sitologiyada HPV DNT testinin üstünlükləri. HPV vaksinin əhəmiyyəti’’, ABŞ-də (Amerika Birləşmiş Ştatları) çalışan Rövnət Babazadə ‘’Ağrısız fizioloji doğuş və anesteziyada yeniliklər’, Almaniyada fəaliyyət göstərən Elvin Piriyev ‘’Fibromaların transservikal radiofrekans ablasiyası’’, İngiltərədə çalışan Fidan İsrafil-bəyli ‘’Qadınlarda hormonəvəzedici terapiyada müasir tendensiyalar’’ və Elnur Əliyev ‘’Sonsuzluğun müalicəsində innovativ üsul: PLC zeta rekombinat zülal və mRNT’’ mövzularında hazırladıqları təqdimatları nümayiş etdiriblər.

 

Daha sonra ‘’Müasir neonatologiya və pediatriya’’ mövzusunda iki ardıcıl panel baş tutub. Tibb elmləri doktoru, dosent, uzman uşaq cərrahı Allahverdi Musayevin moderatorluğu ilə baş tutan birinci sessiyada ekspert qismində uzman oftalmoloq Elşən İbrahimov, uzman pediatr Azər Əhmədov və uzman uşaq endokrinoloqu İlkin Məcidov iştirak edib. Sözügedən panel sessiyasında ABŞ-dən gələn təbiblər Pərviz Hacıyev ‘’Uşaqlarda anadangəlmə urogenital anomaliyalara müasir yanaşmalar’’, Lana Yusufova ‘’Uşaqlarda göz xəstəliklərinin idarəedilməsində yeni yanaşmalar, gen terapiyası’’ və İngiltərədən gələn təbib İlhamə Cəfərli ‘’Androgenə həssaslıq sindromunun X-genlərlə əlaqəsi və xəstələrdə rekonstruktiv cərrahi çətinliklər’’ mövzusunda təqdimatlar nümayiş etdiriblər.

 

Eyni mövzunun ikinci sessiyasına tibb üzrə fəlsəfə doktoru, uzman pediatr Erkin Rəhimov moderatorluq edib. Neonatoloq Rüstəm Hüseynov, tibb elmləri üzrə fəlsəfə doktoru, uzman pediatr, neonatoloq Əkbər Quliyev və tibb elmləri üzrə fəlsəfə doktoru, uzman pediatr Əli Quliyevin iştirakı ilə baş tutan paneldə Səudiyyə Ərəbistanından gələn təbib Röya Hüseynova ‘’Erkən neonatal sepsisin proqnozlaşdırılmasında sepsis kalkulyatorunun tətbiqinin potensial əhəmiyyəti’’, ABŞ-dən gələn təbib Azadə İbrahimova ‘’Göbək ciyəsi qanın müasir müalicədə rolu’’ və Türkiyədən gələn təbib Razin Əmirov ‘’İmmun sistemin anadangəlmə xəstəlikləri: diaqnostika və müalicəsində yeniliklər’’ mövzularında təqdimatla çıxış ediblər.

 

Son sessiya olan ‘’Tibbi xidmətin təşkilində yeni yanaşmalar’’ panelinə tibb üzrə fəlsəfə doktoru, anestezioloq-reanimatoloq Musa Abbasov moderatorluq edib. Ekspert qismində anestezioloq-reanimatoloq Cavid Paşayev, nefroloq Mirələm Calalov və uzman ümumi cərrah Azər İsmayılov iştirak edib. Birləşmiş Ərəb Əmirliklərində fəaliyyət göstərən təbib Sabrin Əzim ‘’Xəstələrə qayğı prossesində ‘’ChatGPT’’ potensialından istifadə imkanları’’, Türkiyədə çalışan təbib Tural Xaspolad ‘’Tibb müəssisələrinin idarəedilməsində innovativ yanaşma’’ və Almaniyada fəaliyyət göstərən təbib Zemfira Babayeva ‘’Fövqəladə hallarda xroniki xəstəliklərin idarə olunması, ilk 48 saat ərzində tibbi yardım’’ mövzusunda təqdimatlar nümayiş etdiriblər.

 

Sonda hər panel üzrə natiqlər auditoriyadan gələn sualları cavablandırıblar.