DATS-ın işgüzar proqramı çərçivəsində panel müzakirələr təşkil edilib

21.06.2023 10:12

TƏBİB-in təşkilatçılığı ilə keçirilən Dünyadakı Azərbaycanlı Təbiblərin Simpoziumunun (DATS) işgüzar proqramı çərçivəsində panel müzakirələr təşkil edilib.

Aztibb.az-a TƏBİB-dən bildirilib ki, “Cərrahiyyədə yeniliklər” adlı panel sessiyası tibb elmləri doktoru, professor Qurbanxan Müslümovun moderatorluğu ilə aparılıb. Tibb elmləri doktoru, ümumi cərrah Elmir Bəşirovun, ümumi cərrah Nazim Həsənovun da yer aldığı panel sessiyasında Almaniyada fəaliyyət göstərən təbib Vüqar Yaqublu “Ağciyər düyünlərinin müayinə və müalicəsində multidisiplinar yanaşma”, Amerika Birləşmiş Ştatlarında çalışan təbib Yusif Hacıyev “Qulaq, burun, boğaz xəstəliklərində müasir yanaşma”, Almaniyada fəaliyyət göstərən təbib Gülşən Əhmədli “Ağır dərəcəli yanıqlarda rekonstruktiv cərrahiyyə” mövzularında təqdimatlarla çıxış ediblər.

Tibb üzrə fəlsəfə doktoru, ümumi cərrah, transplantoloq Mircəlal Kazımi “Robotik cərrahiyyənin imkanları” adlı panel sessiyasının moderatorluğunu edib. Tibb elmləri doktoru, transplantoloq Rəşad Şolanovun, uzman ümumi cərrah Eldar Əhmədovun, tibb üzrə fəlsəfə doktoru, uzman neyrocərrah Fərid Qaralovun ekspert kimi çıxış etdiyi panel sessiyasında Almaniyada fəaliyyət göstərən təbib Ramazan Cabbarlı “Robototexnika və naviqasiyanın spinal neyrocərrahiyyədə tətbiqi”, Türkiyədə çalışan təbib Amil Hüseynov “Orqan transplantasiyası, laparoskopik və robotik cərrahiyyənin üstünlükləri”, Almaniyada fəaliyyət göstərən təbib Hikmət İsmayılov “Urologiyada robotik cərrahiyyə” mövzularında təqdimatlarla çıxış ediblər.

“Urogenital xəstəliklərin cərrahi müalicəsində innovasiyalar” adlı panel sessiyanın moderatorluğu tibb üzrə fəlsəfə doktoru, nefroloq Fariz Babayev tərəfindən aparılıb. Uzman uroloqlar Asif Cahangirov və Elbəyi Daşdəmirlinin də iştirak etdiyi müzakirələrdə Türkiyədə çalışan təbiblər Elbəy Bayramlı “Robotik radikal prostatektomiya”, Coşqun Hüseynov isə “Uroloji xəstəliklərin cərrahi müalicəsində müasir yanaşmalar və istifadə olunan cihazlar” mövzularında təqdimatlarla çıxış ediblər.