USAID/Azerbaijanın dəstəyilə Azərbaycanda təcili yardım həkimlərinin professionallığının artırılmasına dəstək göstərmək üçün xəstəxanayaqədər travma həyat dəstəyi (XTHD) təlimi keçirilib.

 

Aztibb.az ÜST-nin Azərbaycan Nümayəndəliyinə istinadla xəbər verir ki, təlim 12 nəfərlik həkim qrupu üçün Sumqayıt Təlim, Simulyasiya və Qiymətləndirmə Mərkəzində (SUM-Sim) ÜST-nin təcili yardım üzrə ixtisaslaşmış mütəxəssisləri tərəfindən təşkil olunub.

 

XTHD təlimini keçirməkdə əsas məqsəd iştirakçıların mövzu üzrə biliklərini artırmaq, komanda işi, texniki və təlimçi bacarıqlarını gücləndirmək və növbəti təlimləri keçmələri üçün təlimçilər yetişdirməkdir.

 

Üç günlük təlim zamanı proqrama uyğun olaraq ekspertlər iştirakçılara həm nəzəri, həm də müxtəlif ssenarilərin simulyasiyasını canlandıraraq praktik şəkildə təlim keçiblər. Simulyasiyalarda ssenarilərin maksimum real təşkil edilməsi üçün tam təchizatlı təcili tibbi yardım avtomobilindən istifadə edilib.

 

Təlim USAID-in dəstəyilə Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-lə əməkdaşlıqda həyata keçirilən “Azərbaycanda pandemiyaya cavab tədbirləri” layihəsi çərçivəsində baş tutub.